चियावारीमा बंक

युवराज गौतम

इलाम,साउन -  हुनत यहाँ सुविधा सम्पन्न डान्सवार र डिस्को त छैनन । भएका रेष्टुरेन्टमा गफिएर कति समय वित्ला र - जहाँ जे सुविधा छ त्यसको सदुपयोग हुनेनै रहेछ । स्कुल, क्याम्पस धाउने विद्यार्थी बंक (कक्षा छोडेर रमाइलो गर्नु) हान्न डान्सवार र डिस्को नै धाउँछन भन्ने हाम्रो सामान्य बुझाइ छ ।

तर पूर्वी पहाडी जिल्ला इलाममा बंक हान्न विद्यार्थीलाई डान्सवार र डिस्कोको विकल्पमा स्कुल क्याम्पस आसपास रहेका चियावारी डाँडाहरु अब्बल स्थल बन्दै गइरहेका छन् । बंक हान्न चियावारी डाँडा अनि सल्लाघारी पनि उचित स्थल कहलिएको छ ।

    विहान सवा ६ मा पहिलो घण्टी बज्न नपाउँदै महेन्द्र रत्न बहुमुखि क्याम्पस इलामका एकाध युवा दैनिकजसो नजिकैको चियावारी डाँडामा हुन्छन् । 'विहानभरी चियावारीको चिसो मौसममा रमाइलो गर्‍यो अनि अन्तिम घण्टी बज्न लाग्दा घरतिर चल्यो,' क्याम्पस छेउको चियावारी डाँडामा भेटिएका एकहुल युवाले भने-'कोहीबेला पढने मुडनै हुदैन, त्यसपछि त सिधैं चियावारीमा बंक ।' हुनत चियावारी प्रेम जोडीहरुका लागि उपयुक्त हुने गर्दछ । तर अव प्रेमजोडीका लागि मात्र चियावारी साँघुरो हुँदै गइरहेको छ । चियावारीमा त अचेल बंक हान्ने युवाको भिड बढन थालेको देख्न सकिन्छ । क्याम्पसे पोशाकमा सजिएर चियावारी धाउने विद्यार्थी इलाम क्याम्पसका मात्र छैनन । थुप्रै स्कुल तथा प्लसटुका विद्यार्थी चियावारीमा बंक हान्ने गर्छन । 

    सदरमुकाममा नै रहेका आदर्श, इलाम एजुकेसन फाउण्डेसन लगायतका प्लस टुका विद्यार्थी बंक हान्न दश मिनेट माथिपट्ट िरहेको चियावारीमा पुग्ने गर्छन । यता माइवारीको करफोक विद्या मन्दिरका विद्यार्थीका लागि चियावारी मात्र होइन नजिकैको सल्लाघारी पनि बंकका लागि उचित स्थल हुन । 'घरबाट क्याम्पस पढन आएको विद्यार्थी सल्लाघारी र चियावारी डाँडाँमा विहानभरी विताएको पनि भेट्टाएको छु ।' करफोक विद्यामन्दिरकी अध्यापिका रञ्जना चम्लागांइले भनिन-'यस्तो क्रियाकलापले त टिएनएजका विद्यार्थीलाई गलत मार्गतर्फडोर्‍याइरहेको छ ।' यसका लागि क्याम्पसको कडा निगरानी र विद्यार्थीको जिम्मेवारीपन पनि उत्तिकै आवश्यक रहेको उनले सुझाइन । क्याम्पसको आसपासमा बाक्लै रहेका सल्लाघारी विद्यार्थीका लागि उपयुक्त छ । किनकी यहाँ जोडी वनेर प्रेम साटन मात्र होइन, लागु औषध सेवन गर्न पनि असजिलो हुँदैन ।

    इलाम क्याम्पस, करफोक विद्या मन्दिर मात्र बंक हान्ने विद्यार्थी भेटिन्छन भन्नु उचित हुँदैन । हरियाली चियावारीकै कारणले कहलिएको पर्यटकिय स्थल कन्याममा रहेको कृष्णश्रम उच्च मा.वि. पनि यसबाट अछुतो छैन । यहाँ सबैभन्दा धेरै संख्यामा युवा बंक हान्ने भेटिन्छन । हालैको एक दिन केही तल रहेको क्याम्पसमा तेश्रो घण्टीको पढाइ चलिरहँदा क्याम्पसे ड्रेसमा एक हुल युवा चियावारी भित्र मोवाइलमा बजाएको गीतसँगै चिच्याइरहेका भेटिए । यस्ता हुल दैनीक जसो चियावारीमा भेटिन्छन । यतिमात्र नभएर क्याम्पसे ड्रेसमा आगन्तुक पिकनिकेहरुसँ रमाइलो गर्ने विद्यार्थीको संख्या उत्तिकै छ ।  स्थानीय रविन र्राई भन्छन-'पिकनिकको सिजनमा त अधिकांश विद्यार्थी चियावारीमा नै हुन्छन कक्षा कोठाका वेन्चहरु अधिकांश खाली नै हुने गर्छन ।' कन्याममा स्थानीय क्याम्पस, प्लस टु का मात्र होइनन झाँपाका विद्यार्थीहरु पनि मोटरसाइकल हुँइक्याएर यहाँ आइपुग्छन । चियावारीमा बंक हान्नेको भिड बढदै गइरहे पनि शिक्षकहरुलाई यसवारे खासै थाहा छैन । कडा प्रशासन मार्फ विद्यार्थीलाई निगरानी गर्ने प्रचलन क्याम्पसहरुको छैन ।