आजदेखि विश्वकप सुरु

काठमाडौ, जेष्ठ २८ - विश्वकप फुटबल पारखीको चारवर्षे प्रतीक्षाको घडी समाप्त हुँदै छ । सर्वाधिक लोकप्रिय खेलको महाकुम्भ 'विश्वकप दक्षिण अफ्रिकामा शुक्रबार साँझ प्रारम्भ हुन लागेको छ ।

विश्वकपको १९ औं संस्करणले फरक महत्त्व बोकेको छ, अफ्रिकी महादेशमा सर्वाधिक ठूलो फुटबल उत्सवको पहिलो आयोजना । अन्तर्राष्ट्रिय फुटबल महासंघ

(फिफा) ले अफ्रिकामा २०१० को आयोजना गर्ने घोषणा आठ वर्षअघि गरेको थियो । त्यसमा दक्षिण अफ्रिकाले मोरक्को र इजिप्टलाई पछि पार्न सफल रह्यो ।

रंगभेद विरुद्धको आन्दोलनका नायक नेल्सन मन्डेलाको अगुवाइमा दक्षिण अफ्रिकाले विश्वकप आयोजना दाबी गरेको थियो । रंगभेद विरुद्धको राजनीतिक आन्दोलनमा सफलता चुमेका उनले आखिरमा विश्वकप फुटबल दक्षिण अफ्रिकामा भित्र्याई छाडे ।

विश्व फुटबल नयाँ महारथी बन्न ३२ राष्ट्रले प्रतिस्पर्धा गर्दै छन् । कुल २ सय ४ राष्ट्रले दक्षिण अफ्रिकी यात्राका लागि प्रयास गरेका थिए । दक्षिण अफ्रिकाले आयोजकका नाताले स्वतः प्रवेश पायो ।

दक्षिण अमेरिकाका ५, उत्तर अमेरिकाका ३, ओसियानाका १, अफ्रिकाका आयोजकसहित ६, युरोपका १३ र एसियाका ४ टिम सहभागी छन् । एसियाको प्रतिनिधित्व अस्ट्रेलिया, उत्तर कोरिया, दक्षिण कोरिया र जापानले गर्नेछन् ।

नेपालले यो विश्वकप छनोटमा तीन वर्षअघि प्रतिस्पर्धा गरेको थियो । त्यसमा नेपाल सफल रहेन । नेपालले छनोटको पहिलो चरणमा ओमानसँग खेल्यो । नेपाल घरेलु भूमिमा २-० र मस्कटमा २-० ले पराजित भएको थियो । नेपालसँग पाँच पल्टको विश्वकप छनोट अनुभव छ । नेपालले अहिलेसम्म पहिलो चरण पनि पार गर्न सकेको छैन ।

विश्वकपलाई फर्केर हेर्ने हो भने ब्राजिल सर्वाधिक सफल टिम हो । उसले पाँचपल्ट ट्रफी चुमेको छ । दोस्रोमा इटाली छ । डिफेन्डिङ च्याम्पियन उसले चारपल्ट जितेको छ । उसका सामु उपाधि रक्षासँगै ब्राजिलको कीर्तिमान बराबरी गर्ने चुनौती छ ।

स्न १९३० बाट सुरु विश्वकपमा ब्राजिल र इटालीसँग लगातार दुईपल्ट ट्रफी चुमेको इतिहास छ । इटाली १९३४ र ३८ तथा ब्राजिल १९५८ र ६२ मा च्याम्पियन भएका थिए । 

दक्षिण अफ्रिकाले विश्वकप आयोजनाका लागि ९ सहरमा दस रंगशाला तयार पारेको छ । उद्घाटन र समापन जोहानेसवर्गस्थित सकर सीटी रंगशालामा हुनेछ । आयोजक दक्षिण अफिका र मेक्सिकोले नेपाली समयअनुसार बेलुका ७स्४५ बजे विश्वकपको पहिलो खेल खेल्नेछन् । त्यसअघि दुलहीझैं सुसज्जित सकर सीटीमा भव्य उद्घाटन हुनेछ । त्यसमा विश्व राजनीतिका 'रोल मोडेल मन्डेलासँगै ९० हजार उपस्थित हुनेछन् ।

लामो समयदेखि विश्वकप फुटबल पछ्याइरहेका नेपाली समर्थकका लागि अफ्रिकी मुलुकको समय उपयुक्त नै मान्नुपर्छ । दिनभरि काम सकेर साँझ र राति खेल हेर्न सकिनेछ । शनिबारदेखि तीन खेल हुनेछन् । पहिलो साँझ ५स्१५, दोस्रो ७स्४५ र तेस्रो खेल मध्यरात १२:१५ मा सुरु हुनेछन् ।