राजधानीबाटै ईन्जिनियर बेपत्ता

काठमाडौं, भाद्र २० - काठमाडौं बानेश्वरका एक ईन्जिनियर तीन दिनदेखि वेपत्ता भएका छन् । ललितपुर कुमारीपाटीस्थित ग्रामीण प्रविधि केन्द्रका ईन्जिनियर ३५ वर्षिय महेन्द्र चुँडाल तीन दिनदेखि सम्पर्कविहीन छन् ।

कार्यालयबाट बानेश्वर-१० देवीनगरस्थित आफ्नो निवास फर्कनेक्रममा मोटरसाइकलसहित चुँडाल वेपत्ता भएका उनका बाबु खगेन्द्र चुँडालले जानकारी दिए । 'अस्ति शुक्रबार ४ बजेदेखि उसको मोबाइल पनि 'स्वीच अफ' छ, उसको पनि खबरखाबर केही पाइएको छैन,' बाबु खगेन्द्रले ईकान्तिपुरसित भने ।

बगलामुखी शंखमूल पुल हुँदै बानेश्वस्थित आफ्नो निवास फर्कने क्रममा बा ३५ प ४७७४ नम्वरको रातो रंगको हिरोहोन्डा प्यासन मोटरसाइकलसहित ईन्जिनियर चुँडाल बेपत्ता भएका हुन् ।

यसैबीच परिवारजनले आइतबार अपिल जारी गर्दै जीवन रक्षाका लागि पहल गरिदिन सञ्चारकर्मी, मानवअधिकारवादी र सरकारसँग अनुरोध गरेको छ । कुनै पनि राजनीतिक पक्षसँग आस्था नराख्ने चुँडालको बारेमा तीन दिन बितिसक्दापनि कुनै सूचना नपाउँदा परिवारजन चिन्तित र पीडामा रहेको अपिलमा उल्लेख छ ।

बेपत्ता भएयता कसैले कुनै प्रकारको धाकधम्की नदिएको तथा कुनैपनि प्रकारको मागपनि नराखेकाले पीडा थपिएको अपिलमा लेखिएको छ । Source: ekantipur