पोथी भगाएर बस्ती छिरेको हात्तीले कुल्चेपछि पूर्व हवल्दारको मृत्यु

चाँदनी हमाल, चितवन, भदौ १९- पश्चिम चितवनको मेघौलीमा हात्तीले कुल्चेपछि शनिबार एक पूर्व प्रहरी हवल्दारको मृत्यु भएको छ। शनिवार दिउसो साँढे एक बजे भाले-पोथी हात्ती बस्तीमा पसेर आक्रमण गर्दा मेघौली-३ जितपुरका ५६ वर्षीय  पूर्व प्रहरी हवल्दार सुकबहादुर गुरुङको ज्यान गएको हो।
जङ्गली हात्तीले निकुञ्जभित्र रहेको टाइगर टप्स होटलको पोथी हात्तीलाई भगाएर बस्ती छिरेका बेला गुरुङलाई आक्रमण गरेको हो। गुरुङ २०५२ सालका रिटायर प्रहरी हवल्दार हुन्। गोर्खा आरुघाट पुरानो घर भएका गुरुङको परिवार एक वर्षअघि मात्र चितवन आएका थिए।

घरछेउमा निस्किएका बेला लठारिँदै आएको भाले–पोथी हात्तीले आक्रमण गर्दा उनको घटनास्थलमै ज्यान गएको स्थानीय श्यामसुन्दर बिष्टले जानकारी दिए। उनको पेटमा हात्तीले कुल्चिएको दिव्यनगर प्रहरीले जनाएको छ। उनको शरीरका अङ्ग क्षतविक्षत भएका छन्।

चितवनको राष्ट्रिय निकुञ्जभित्र रहेको टाइगर टप्सको पालुवा पोथी हात्ती र जङ्गली भाले हात्ती बस्तीमा पसेपछि शनिबार दिनभर मेघौलीको जनजीवन त्रसित भयो। हात्तीले चार वटा घरमा पसेर धानको भकारीमा समेत क्षती पुर्‍याएको छ।

हात्ती नियन्त्रण गर्न दिव्यनगर प्रहरी चौकीबाट खटिएको एक टोलीलाई झण्डै तीन घण्टा लागेको थियो। दिउसो १२ बजे बस्ती पसेको जङ्गली हात्तीलाई अपराह्‍न तीन बजेमात्र जङ्गल पठाएको दिव्यनगरका प्रहरी नायव निरीक्षक मिनबहादुर ज्ञवालीले जानकारी दिए।

हात्ती नियन्त्रणमा १५ राउण्ड हवाई फायर गरेको ज्ञवालीले बताए। पालुवा हात्ती भने टाइगर टप्सलाई जिम्मा लगाइएको छ। हात्ती सामूहिकरुपमा सामान लिन गएका बेला एक्कासि जङ्गलको भाले हात्तीले आफूहरुको पोथी हात्ती चनचनकलीलाई लिएर गएको टाइगर टप्सका  प्रशासकीय प्रमुख रामसिं गुरुङले बताए। हात्तीका माहुतेहरु भने जङ्गली हात्तीको डरले हामफालेर भागेको उनले बताए। चनचनकलीसँगै समशेरगज र भृकुटीकली सामान लिन राप्ती घाट गएका थिए।

हात्ती आउने डर भने यथावत् रहेको स्थानीयबासीले बताएका छन्। उनीहरुले पीडित परिवारलाई राहत दिन माग गरेका छन्। स्रोत :ekantipur