दुवै फोरम माओवादीलाई साथ दिने तयारीमा

काठमाडौं, भदौ १७ - मधेसी मोर्चाका दुई घटक भदौ २० को प्रधानमन्त्री चुनावमा एकीकृत माओवादी अध्यक्ष पुष्पकमल दाहाललाई समर्थन दिने अवस्थामा पुगेका छन्। माओवादीसँगको पछिल्लो वार्तापछि मधेसी जनअधिकार फोरम र फोरम लोकतान्त्रिकले तटस्थ रहने निर्णय पुनर्विचार गर्न लागेका हुन्।

माओवादी आफ्नो नेतृत्वमा सरकार बनेको एक साताभित्र वाइसिएललाई ब्यारेक बाहिर राख्न, एक महिनाभित्र कब्जा गरिएको सम्पत्ति फिर्ता गर्न र ८ हजार लडाकुलाई सुरक्षा निकायमा समायोजन गर्न सकारात्मक रहेको स्रोतले बतायो।
फोरम अध्यक्ष उपेन्द्र यादव र फोरम लोकतान्त्रिकका अध्यक्ष विजयकुमार गच्छदारले संयुक्त रूपमा मंगलबार माओवादी अध्यक्ष पुष्पकमल दाहालसँग भेटवार्ता गरेका थिए।
'पटक पटक वार्ता भएका छन्, पछिल्लो वार्तापछि एउटा सहमति बनिसकेको छ,' स्रोतले भन्यो, 'अन्यथा केही भएन भने भदौ २० गते कम्तीमा दुई फोरमले माओवादीलाई मत दिन्छन्।'
अहिलेसम्मको समीकरणका आधारमा माओवादी, दुवै फोरम, नेकपा संयुक्त, माले समाजवादी, राप्रपा नेपाल, नेपाल सद्भावना पार्टी (सरिता गिरी) र केही साना दलसमेत गरी दाहालले ३ सय १२ देखि १४ मत पाउने स्रोतको दाबी छ।
स्रोतका अनुसार मधेसी मोर्चाले अघि सारेको अवधारणामध्ये सेना समायोजन र शान्ति प्रक्रियासँग सम्बन्धित विषयमा माओवादी सहमति बनेको छ भने संविधान निर्माण सम्बद्ध अन्य बुँदालाई दुवै फोरमले त्यागेका छन्।
'संविधान निर्माणका अन्तर्वस्तुका कुरा अन्य राजनीतिक दलसँग पनि सम्बन्धित भएकाले अहिलेलाई थाँती राखिएको हो,' वार्तामा संलग्न एक नेताले ती भने।
संविधानका अन्तर्वस्तुमध्येस्वायत्त मधेस प्रदेश र बहुदलीयतामा आधारित राजनीतिक प्रणालीलाई मधेसी मोर्चाले सर्तका रूपमा राख्दै आएका छन्।
फोरम प्रवक्ता रत्नेश्वरलाल कायस्थ लेमधेसी दलका उच्च नेतृत्व र माओवादीबीच भेटघाट भइरहेको स्वीकारे। 'केही दिनयता उच्चस्तरमा वार्ता भइरहेको छ,' उनले नागरिकसँग भने, 'ठोस निर्णय भइसकेको छैन। केही न केही नयाँ कुरा पक्कै हुनुपर्छ।' कायस्थले एमाले र माओवादीबीच पनि वार्ता भइरहेको जानकारी पाएको बताए।
फोरम लोकतान्त्रिक संसदीय दलका प्रमुख सचेतक रामजनम चौधरीले भने १९ गते मात्र ठोस निर्णय हुने बताए। 'माओवादी नेतृत्वमा सहमति भइसकेको मलाई थाहा छैन,' चौधरीले भने, 'विभिन्न खेल भइरहेका छन्, तर केही भइहाल्ला जस्तो लाग्दैन।'
फोरम लोकतान्त्रिककै वरिष्ठ नेता शरदसिंह भण्डारीले पनि माओवादीलाई समर्थनबारे अनभिज्ञता प्रकट गरे। 'सहमति भए जस्तो लाग्दैन, फोरम मात्र होइन, मोर्चाको कुरा हो।'
चार मधेसी दलको मोर्चामा भने यसबारे छलफल भएको छैन। 'के भइराखेको छ, मलाई थाहा छैन,' मोर्चाको एक घटक नेपाल सद्भावना पार्टीका अध्यक्ष राजेन्द्र महतोले भने, 'मलाई केही हुन्छ जस्तो पनि लाग्दैन।'
फोरमका शीर्ष नेताहरू माओवादीसँगको पछिल्लो सहमतिबारे १, २ दिनमै मोर्चाको बैठक बोलाएर जानकारी गराउने र अन्य घटकको पनि समर्थन लिने प्रयासमा छन्। 'आज (बिहीबार) देखि मोर्चामा प्रस्ताव जान्छ,' फोरम नेताले भने, 'सकभर सिंगो मोर्चै सरकारमा जान्छ।'
माओवादीलाई समर्थन दिने कि नदिने भन्ने विवादकै कारण मोर्चाको संस्थागत संरचना बनाउने तीन सातादेखिको अभ्यास अहिले थन्किएको छ।  

विश्वमणि पोखरेल /  नागरिक