'अनमिनको भूमिकाले निरन्तरता नपाए शान्ति प्रकृया भंग हुने खतरा'

काठमाडौ, भाद्र १५ - एमाले अध्यक्ष झलनाथ खनालले अनमिनको निरन्तरतामा अवरोध आए शान्ति प्रकृया भंग हुने खतरा आउने बताएका छन् ।  अनमिनको कमिकमजोरी भए त्यसलाई उपयुक्त र तरिका पुर्‍याएर आलोचना गर्नुपर्ने बताउदै अनमिनलाई निरन्तरता दिनुपर्ने पनि उनले बताए ।

'अनमिनलाई अहिले निरन्तरता दिनुपर्छ । शान्ति प्रकृयालाई टुंगोमा पुर्‍याउनुपर्छ । अन्यथा शान्ति प्रकृया भंग हुने खतरा हुन्छ ।' रेडियो कान्तिपुरसँग मंगलबार कुरा गर्दै उनले भने, 'अनमिनको कमि कमजोरी भए त्यसलाई उपयुक्त र तरिका पुर्‍याएर आलोचना गर्नुपर्छ । कमि कमजोरी हटाउनुपर्छ ।'

शान्ति प्रकृयालाई टुंगोमा पुर्‍याउने महत्वपूर्ण अवयवको रुपमा अनमिनले भूमिका खेल्दै आएको भन्दै खनालले उसको भूमिकालाई निरन्तरता दिनुपर्ने बताए । उनले भने, 'अनमिनले जुन भूमिका खेल्दै आएको छ । त्यसलाई अन्तिमसम्म भूमिका खेल्न दिनुपर्छ ।' अनमिनलाई निरन्तरता दिएपनि उसको भूमिका सिमित राखिनुपर्ने भनाइहरु आइरहेको बेला खनालको यस्तो बिचार आएको हो ।

 शान्ति प्रकृया र अनमिनको भूमिका आफै संबैधानिक प्रकृयाको रुपमा रहेकोले सहमतिमा जानुको विकल्प नभएको उनले बताए । एमालेकै बरिष्ठ नेता रहेका प्रधानमन्त्री माधवकुमार नेपालले भने अनमिनप्रति असन्तुष्टि जनाउदै आएका छन् ।   इ कांतिपुर