सेना सहभागी नभएपछि जेएमसीसीको बैठक स्थगित

काठमाडौ, भाद्र १० - नेपाली सेना सहभागी नहुने भएपछि बिहीबार तय भएको हतियार तथा सेनाको संयुक्त अनुगमन समिति (जेएमसीसी) को बैठक फेरी स्थगित गरिएको छ । संयुक्त राष्ट्र संघीय मिसन (अनमिन) को हतियार अनुगमनकर्ताको नेतृत्वमा रहेको समितिको बैठक लगातार रुपमा स्थगित भएको यो तेस्रो पटक हो ।

समितिमा नेपाली सेना र माओवादी सेनाका प्रतिनिधिहरुसहित ९ सदस्य छन् ।

'सैन्य भर्ती विषयलाई बैठकको एजेण्डामा नराख्न हामीले अनुरोध गरेका थियौं' सैनिक प्रबक्ता रमिन्द्र श्रेत्रीले भने, 'तर, त्यसलाई नहटाइए पछि हामीले बैठकमा भाग नलिने निर्णय गरेका हौं ।'

अनमिनका प्रबक्ता कसमस विश्वकर्माले पनि सेनाको अनुरोधमा बैठक स्थगित गरिएको जनाए । समितिमा नौ सदस्य छन् । यसले शिविरमा रहेका माओवादी लडाकु तथा कन्टेनरमा राखेको हतियार र त्यही संख्यामा कन्टेनरमा राखेको नेपाली सेनाको हतियार अनुगमनको समिक्षा गर्ने गर्दछ ।

पछिल्लो पटक नेपाली सेनाले सैन्य भर्ना खोले पछि विवाद पुन: सुरु भएको थियो । त्यसै सम्बन्धमा छलफलका लागि माओवादीका सदस्यहरुले समितिको बैठक बोलाउन माग गरेका थिए । तर, सेनाले उक्त विषयमा छलफल आफ्ना लागि मान्य नभएको बताउँदै आएको छ ।

अनमिन प्रवक्ता विश्वकर्माले अर्को बैठक कहिले बस्ने भन्ने सम्बन्धमा छलफल भइरहेको उल्लेख गरेका छन् ।ईकान्तिपुर