आयल निगमका पूर्व महाप्रबन्धक शर्मालाई एक वर्ष कैद र २ करोड जफत

काठमाडौं, भदौ १७ - विशेष अदालत, काठमाडौंले नेपाल आयल निगमका तत्कालीन महाप्रबन्धक मदनराज शर्माले करिब २ करोड रुपैयाँ बराबर भ्रष्टाचार गरेको फैसला सुनाएको छ। बिहीबारको उक्त फैसलामा १ वर्ष कैद र २ करोड २ लाख ४१ हजार ८४ रुपैयाँ र १६ पैसा बराबरको सम्पत्ति जफतसमेत हुने उल्लेख छ।

२०६० फागुन १८ गते दायर मुद्दामा अदालतले बिहीबार फैसला सुनाएको हो। प्रतिवादीको आय र सम्पत्तिको हिसाव किताव गर्दा प्रतिवादी मदनराज शर्मा, निजकी पत्नी रुपा ढुङ्गेल र छोरी प्रिति ढुङ्गेल (भण्डारी) समेतका नाममा चलअचल गरी रु.३,१६,७९,१९३।२३ बराबरको सम्पत्ति रहेको उल्लेख गर्दै फैसलामा भनिएको छ- त्यसमध्ये रु.१,१४,३८,१०९।३३ बराबरको सम्पत्ति वैध स्रोत खुलेको र रु.२,०२,४१,०८४।१६ बराबरको वैध स्रोत नखुलेको सम्पत्ति रहे भएको देखिन आयो।

वैध स्रोत नखुलेको रु.२,०२,४१,०८४।१६ बराबरको सम्पत्ति राखी तत्कालीन भ्रष्टाचार निवारण ऐन, २०१७ को दफा ३, ७(१) र हालको भ्रष्टाचार निवारण ऐन, २०५९ को दफा २०(१) वमोजिम निजले सार्वजनिक पदमा बहाल रहँदा पदको दुरुपयोग गरी गैरकानुनीरुपमा सम्पत्ति आर्जन गरी भष्टाचारको कसुर गरेको ठहर्छ - फैसलामा भनिएको छ।

फैसलाले भनेको छ- सो ठहरेकाले निज प्रतिवादी मदनराज शर्मालाई भ्रष्टाचार निवारण ऐन, २०५९ को दफा २० (२) बमोजिम कैद वर्ष १ (एक) र विगोबमोजिम जरिवाना भई बिगो रु.२,०२,४१,०८४।१६ (दुई करोड दुई लाख एकचालीस हजार चौरासी रुपैयाँ र सोह्र पैसा) बराबरको सम्पत्ति जफतसमेत हुन्छ।

फैसला गर्ने इजलासका अध्यक्ष गौरीबहादुर कार्की थिए भने सदस्यमा ओमप्रकाश मिश्र र केदारप्रसाद चालिसे थिए।

अब यस अदालतमा गैरकानुनी सम्पत्ति आर्जन अर्थात् अकुत सम्पत्तिसम्बन्धी मुद्दा बाँकी नरहेको र लगभग ३ वर्षदेखि अकुत सम्पत्तिसम्बन्धी मुद्दा दायर हुन नआएका पनि अदालतले जारी गरेको विज्ञप्तिमा उल्लेख छ।   News: नागरिक